Македонија е мала, но големи сме во срцето и успесите: Злато и бронза за Ева и Илина Соколовски во Германија

За овие две сестри не постојат граници...

Македонските девојчиња Илина (16) и Ева (13) донесоа злато и бронза за Германија. Двете сестри Македонки, кои живеат во Германија, го освоија првото, односно третото место на турнирот по ритмичка гимнастика во републичките наптревари и своите витрини ги закитија со по уште еден пехар.

Успехот е поголем што Илина и Ева со нивните години се натпреваруваат во поголемите класи. Ева, која има 13 се натпреваруваше во класа до 15 годишна возраст, на турнирот во германското градче Падерборн и по четврти пат го освои првото место. 

Додека Илина, која има 16 години на турнирот во Бохум го освои третото место. Токму поради овој голем успех двете се квалифицира во полуфиналето на Германија кое ќе се одржи на 29 и 30 овој месец во Хепенхајм. 

Илина, која веќе има и интернационална кариера се натпреварува во сениорската класа, но за разлика од изминатите години сега конкуренцијата е многу посилна, а тоа и дава мотив повеќе да реди успеси. 

„Ми предизвикува задоволство да се натпреварувам во ваква силна конкуренција. Велам силна е конкуренцијата, бидејки многу гимнастичарки од Украина и Русија поради проблемите во своите држави ги потполнија германските клубови. Веќе неколку години ја следам мојата конкуренција, тоа се гимнастичарки поголеми по возраст од мене. Тие некогаш беа мои идоли, а сега ќе треба да ги мерам моите вештини со нив. Знам дека ова за мене е нешто ново, нешто што бара многу труд, но не се плашам. Знам дека ние доаѓаме од малата Македонија, но сме големи во срцето и успесите. Затоа не се плашам“ - ни рече Илина, која ќе ја претставува Македонија на евроското првенство во гимнастика.

„Откако одлучив да ги бранам боите на нашата татковина не застанувам. Тренирам по шест пати во неделата, а по четири часа преку викендите, но некогаш се случува и по шест часа. И не ми е тешко ништо, напротив, сѐ правам со голема желба, во најдобро светло да ја претставам Македонија“ - рече Илина.

фото: Приватна архива