Учениците од Дрен во посета на Турција преку проектот „Сите сме различни, сите заедно сме Европа“!

Веќе 3 години по ред, СЕПУГС Васил Антевски – Дрен заедно со четири партнер училишта од Турција, Шпанија, Португалија и Латвија, учествува во проект добиен преку Националаната агенција за европски образовни програми и мобилност на Република Македонија, во рамките на програмата Ерасмус +.

Името на проектот е „Сите сме различни, сите заедно сме Европа“ (WE ARE DIFFERENT, WE ARE EUROPE ALL TOGETHER), а идејата на истиот е учениците да се запознаат со различните култури на партнер државите и да го продлабочат знаењета за истите. Крајната цел на овој проект е да се зголеми културолошката свесност кај младата популација. Официјален јазик на проектот е англискиот, но со цел унапредување на другите јазици се користат и јазиците од сите партнер држави.

Последна во низата активности на учениците и професорките од Дрен, беше онаа во Сивас, Турција. И овој пат тие биле сместени во семејства, каде што одблизу се запознаваат со турската традиција, обичаи, култура, како и секојдневните навики.

Учениците исто така се запознаа и со образовниот систем на Турција, со нивните методи кои ги применуваат во наставата. Преку слики и презентации учениците од СЕПУГС Васил Антевски – Дрен го промовираа Градот Скопје, својата земја и училиште, зборуваа за македонската литература, а за крај ги почестија сите присутни со македонска традиционална закуска.

„Би сакале да ги охрабриме сите училишта кои досега не учествувале во проектите на Ерасмус+ програмата да се потрудат и да земат учество во истите, бидејќи бенефитот од истите е голем и може да се почувствува и види само доколку директно се земе учество“ – истакнуваат од СЕПУГС Васил Антевски Дрен.