Еден сребрен и 5 бронзени медали за Македнија на Олимпијадата по природни науки: Во Дубаи шест пати се вееше македонското знаме

Во конкуренција од 360 натпреварувачи, од 59 држави, македонските претставници на Олимпијадата по природни науки освоија шест медали.

Олимпијадата се одржуваше во Дубаи, Обединетите Арапски Емирати, а оваа вест ја споделија од Друштвото на физичарите на Република Македонија (ДФРМ).

Алексиј Тасиќ од ПСУ „Јахја Кемал“ од Скопје освои сребро, а неговите соученици Андреј Стојановски и Матеа Митревска бронза. Со бронза се закитија и Иван Костевски и Марио Ванчоски од УСП „Славчо Стојменски“ од Штип и Теона Ана Георгиевска од ООУ „Љубен Лапе“ од општина Аеродром, Скопје.

„Создаваме вредности! Честитки за учениците и целиот тим (организација на натпревари по физика, хемија и биологија, подготовки на ПМФ, лидери, набљудувачи, надгледувачи во хотел, техничка поддршка...)“ - посочија од ДФРМ на нивниот Фејсбук профил.