Италијанската писателка Роза Вентрела онлајн ќе го промовира македонското издание на романот „Градината на олеандрите“

Интернационалниот бестселер „Градината на олеандрите“ од италијанската писателка Роза Вентрела ќе биде промовиран вечерва (20 декември, понеделник), со почеток во 19 часот, преку онлајн-разговорот, кој во живо ќе може да се проследи на фејсбук-страницата на издавачката куќа „Арс Ламина“. Покрај авторката, на онлајн-промоцијата ќе се вклучат и проф. д-р Радица Никодиновска, која го преведе романот од италијански јазик, како и претставник од амбасадата на Италија во Р. С. Македонија и студенти на Катедрата за италијански јазик и книжевност. Модераторка на промоцијата ќе биде Татјана Димовска-Атанасова, уредничка во „Арс Ламина“.

Романот, кој на македонски јазик е во издание на „Арс Либрис“, дел од „Арс Ламина – публикации“, е поддржан од Министерството за надворешни работи и меѓународна соработка на Италија.

„Градината на олеандрите“ е семејна сага за испреплетените судбини на четири храбри и уникатни жени и мирисот на волшебната земја, Апулија.
Во градината на една куќа во Карбонара, во Апулија, цвета олеандер. Го насадува Агостино, кога се преселува таму со неговата сопруга Анита, позната како „Марџала“.
Жена со ретка и мистична убавина, Марџала има моќ да ги смири болките кај новороденчињата, претставува скапоцена помош при раѓање и, доколку е потребно, е во состојба да отстранува клетви. Има три ќерки: Розета, Корнелија и Дијаманте, која е најмладата. Првата е убава и дива како и таа. Втората има коса со боја на мед и истите светли, продорни очи на нејзиниот татко. Од друга страна, Дијаманте е полничка, со виткана и нескротлива коса и е своеглава.

Со постојано остар и прониклив поглед, речиси никогаш не препуштајќи се на нежност, со текот на годините Марџала станува сведок на смртта на нејзиниот сопруг, на почеток на војна и на растењето и созревањето на нејзините ќерки, со нивните несреќни љубови, горливи страсти, горчливи разочарувања.

Смирувачкото присуство на Марџала, обвиткано со нејзината непробојна тишина, е постојано тука да ги надгледува, дури и спроти најнепредвидливата судбина...

Роза Вентрела е родена во Бари, а во моментов живее во Кремона. Дипломирала на катедрата за современа историја, а мастер-диплома стекнала од областа на менаџмент во образованието. Долго време пишувала за специјализирани списанија за историја и држела предавања за положбата на жената низ историјата: нејзините романи најчесто говорат токму за чувствата и проблемите на жените. Работела и како уредник во издаваштвото, а веќе со години држи настава за креативно пишување за деца и за возрасни. На македонски, а во издание на „Арс Ламина“, е преведен и нејзиниот роман „Приказна за едно семејство“.

Книгата е достапна во сите книжарници на „Литература.мк“, како и онлајн на интернет-страницата www.literatura.mk