„Музеј на детството“ од Алма Растодер е прозна сложувалка од повеќе приказни за детството

Новата книга за деца и млади „Музеј на детството“ од авторката Алма Растодер ќе биде промовирана на 17 март (четврток), со почеток во 19 часот, во книжарницата „Literatura.mk Superstore“ во „Скопје сити мол“. Промоторка на книгата, која е во издание на „Либи“, дел од „Арс Ламина – публикации“, ќе биде уредничката Оливера Ќорвезироска.

„Музеј на детството“, која е дел од едицијата „Либи тин“, е прозна сложувалка, колаж, пачворк од повеќе приказни за детството во различно време и од различни простори, врзани меѓу себе, допрени во една определена точка или сосем самостојни. Она што ги обединува во целина и што овозможува да ги читаме и како фрагментарен роман за млади е можноста личните приказни да се сфатат како книжевни експонати во замислениот музеј на детството, што е и носечката идеја при раскажувањето.

Во книгата авторката вели:
„Сакам да направам нешто многу важно со кое ќе го спасам човештвото од заборав на емоциите од детството. Тоа би бил првиот Музеј на детството. Оттаму од каде што доаѓам многу се ценат вистинските чувства, возбудувањата, искрените зборови... Музејот ќе биде вистината за едно дете, кое, каде и да се наоѓа, чувствува и се соочува со слични или исти настани“. 

Првичната инспирација за пишување на книгата е чувството на заробеност во сопственото тело и ум, чувството на отуѓеност што некои деца ги чувствуваат додека растат. Во тие моменти, децата најчесто се чувствуваат како да се заробени во некаков стаклен сад, во песочен часовник – гледаат сè што се случува околу нив, но не можат да реагираат. Тоа е и темата на првиот дел од книгата. Во приказните, пак, на неколкуте ликови, кои следуваат во т.н. втор дел, авторката се обидела да ги посочи најчестите причини поради кои децата го добиваат тоа чувство на заробеност и како тоа се рефлектира понатаму во животот. Некои од ликовите успеваат да ги надминат своите стравови, некои, за жал не.

– Инспирацијата ја добив од друг сегмент од растењето на децата, кој е сеприсутен, а тоа е технологијата и социјалните медиуми. Поради нив се случува, отуѓеноста на децата или да се зголеми или да се интерпретира на друг начин, преку создавање на поинакво јас кое ќе биде допадливо за другите. Токму затоа, еден од ликовите се одлучува да создаде Музеј на детството. Место каде што ќе се навратиме на вистинските чувства и емоции, на сеќавањата од детството, кое ќе биде потсетник на тоа што навистина сме биле – дете, кое, каде и да се наоѓа, чувствува и се соочува со слични или исти настани. Дете кое го осознава светот и сака да биде дел од него – вели авторката.

Алма Растодер е родена на 01.07.1986 година во Скопје. Дипломирала на катедрата за општа и компаративна книжевност на Филолошкиот факултет „Блаже Конески“, при Универзитетот „Св. Кирил и Методиј“. Уредник е во списание специјализирано за трговија со стоки за широка потрошувачка. Пишува поезија и проза. Нејзината прва книга наменета за деца е објавена на три јазици: „Сонливи приказни од тајната шума / Sanjive priče iz tajne šume / Tregimet e pyllit magjik“ (2019 г.). Нејзините песни „Kао cvijet iz kamena“ и „Pronašla sam ljubav“ се вклучени во збирката поезија „Mostovi prijateljstva“, а расказот „Белата шапка“ во електронското издание на „Карантински приказни“.

Книгата „Музеј на детството“ веќе е достапна во сите книжарници на „Литература.мк“ и онлајн преку www.literatura.mk.

* ПР - објава