Херој на денот: 9 - годишниот Никола донираше матични клетки за својата сестра

Деветгодишниот Никола е момче херој. Со своите 9 години направи нешто за што многумина возрасни не би се одлучиле. Имено, тој беше донатор на матични клетки за неговата сестра.

Министерот за здравство, Венко Филипче, денеска беше да го посети, а импресиите од посетата, како и возбудата од херојството на овој млад човек ги сподели со јавноста на својот Фејсбук профил.

„Денеска го запознав деветгодишниот Никола, голем херој и инспирација за сите нас. Тој е донатор на матични клетки за неговата сестра на која и е потребен третман со трансплантација на матични клетки. Процедурата афереза на периферни матични клетки, во која донатор е дете, се изведува за прв пат кај нас на Клиниката за хематологија со помош на Клиниката за педијатрија. Сега пациентите нема да патуваат во странство, а и децата ќе може да спасуваат животи на членови на нивните семејства. На Клиниката за хематологија, во период од 3 години се реализирани над 150 трансплантации, од кои 6 хаплоидентични трансплантации, 20 трансплантации од несроден донор, најсложени интервенции заради кои во минатото пациентите беа праќани за третман во странски центри. Резултатите од третманот со овие интервенции се идентични со оние од европските центри за трансплантација и се пријавуваат во базата на Европската група за трансплантација на матични клетки (ЕБМТ) во која членува и тимот за трансплантација на клиниката од 2003 година. За оваа заложба, посветеност и екпертиза им честитам на моите колеги.“ - напиша министерот на објавата на својот Фејсбук профил.