Со сопственото тело спаси дете од ладнокрвниот убиец: Наставничката Елвира го изгуби животот за да го спаси ученикот

Русија е во жалост откако седум ученици и двајца наставници го загубија животот вчера по нападот од ладнокрвен убиец, тинејџер. А денес со огромна жалост е испратена наставничката која го изгуби животот за да заштити ученик со сопственото тело.

Роднините, пријателите и учениците денеска ја испратија на вечно почивање Елвира Игнатијева (26), наставничка по англиски јазик, која загина во вчерашниот напад врз училиште во Казањ.

Децата со цвеќе во рацете, плачеа зад ковчегот на нивната омилена учителка, која беше погребана денес на градските гробишта.

Елвира го загуби животот заштитувајќи дете од убиец, кој насилно влета во училиштето и започна да убива деца. Храбрата учителка излегла во ходникот во моментот кога вооружениот Илназ Галјавиев го извадил оружјето и пукал кон сите пред него. Во последен момент успеала да го повлече детето кое се нашло пред оружјето на Галјавиев и да го заштити со сопственото тело.

Елвира доби смртоносен истрел и остана неподвижна лежејќи во ходникот на училиштето, додека учениците панично скокаа од прозорците за да си го спасат животот.

Да потсетиме, седум деца и двајца наставници беа убиени во нападот на училиштето во главниот град на Татарстан, во Русија.
Поранешен ученик од училиштето, 19-годишниот Илназ, е осомничен за нападот, кој објавуваше страшни пораки на социјалните мрежи пред нападот.

Тој влегол во гимназијата вооружен и со многу муниција во раните утрински часови, тешко го ранил чуварот. После тоа, тој отишол во ходниците, пукајќи кон секоја личност што ја видел. Во нападот беа повредени над 20 лица. Полицијата успеа да го најде напаѓачот, кој потоа беше приведен. Наводно за време на испрашувањето тврдел дека е „роден како Бог, но дека неодамна го сфатил тоа“.

извор:telegraf.rs