Пријавувањето завршува на 9 април: Последна шанса за учество на Авицена Женска Трка 2025

На  9 април (среда) завршува пријавувањето за учество во 13-тото издание на Авицена Женска Трка 2025, кое ќе се одржи на 13 април (недела) со почеток во 10:00 часот. Сите заинтересирани учеснички имаат уште неколку дена да се регистрираат и да станат дел од овој инспиративен спортски настан.

Пријавувањето е едноставно и се врши онлајн преку официјалната веб-страница: https://zenskatrka.mk/prijavuvanje/. Важно е да се напомене дека на денот на трката не е возможно пријавување, па сите кои сакаат да учествуваат треба да го сторат тоа најдоцна до 9 април.

Трката, која традиционално се одржува во организација на Сојуз на спортови на Скопје и под покровителство на Град Скопје, е отворена за сите припаднички на женскиот пол, без оглед на возраста. Стартот ќе биде во 10:00 часот од булевар „Илинден“, во близина на фонтана „Лотос“, а пред почетокот, во 09:40 часот, учесничките ќе имаат можност за загревање со аеробик вежби.

Авицена Женска Трка 2025 не е само спортски настан – таа е симбол на женска сила, мотивација и заедништво. Покрај главната трка, учесничките ќе имаат можност да освојат вредни награди и да учествуваат во лотарија со подароци од партнерите на трката.

Организаторите ги охрабруваат сите жени да ја искористат последната можност за пријавување и да станат дел од најголемата женска спортска манифестација во Македонија.